Ադրբեջանի ռազմականացման մեջ Գորիկ Հակոբյանը Հայոց ցեղասպանության կրկնության վտանգ է տեսնում

Կոռուպցիայի դեմ պայքարն ու միջազգային ահաբեկչությանը դիմագրավելը Հայաստանի անվտանգության ոլորտի առաջնային խնդիրներն են` ըստ Ազգային անվտանգության ծառայության պետ Գորիկ Հակոբյանի: Իսկ երկրի անվտանգությանը սպառնացող արտաքին վտանգը, ինչպես «Ջեյնս Ինթելիջընս Դայջեսթ»-ին տված հարցազրույցում ասել է Հակոբյանը, Հայոց ցեղասպանության կրկնվելու հավանականությունն է:

«Մենք մտահոգված են Հայոց ցեղասպանության կրկնության հնարավորությամբ, քանի որ Ադրբեջանը ինտենսիվորեն ռազմականացվում է, եւ մեր հարեւանները պարբերաբար հայտարարություններ են տարածում Լեռնային Ղարաբաղը ռազմական ճանապարհով հետ վերցնելու իրենց ծրագրերի մասին», — մեկնաբանել է Հայաստանի Ազգային անվտանգության ծառայության պետը: — «Հայաստանի վարած հավասարակշիռ արտաքին քաղաքականությունը եւ համագործակցությունը առաջատար երկրների եւ կազմակերպությունների հետ ապացուցում են, որ մեր երկիրը խաղաղության կողմն է»:

Գորիկ Հակոբյանը նաեւ նշել է, որ նախագահ Սերժ Սարգսյանի հրամանով Ազգային անվտանգության ծառայությունը հատուկ միջոցներ է ձեռնարկում` հասարակությանը հակակոռուպցիոն պայքարում ներգրավելու եւ երկրում կոռուպցիայի մակարդակը վերահսկելու նպատակով: Նույն նպատակին են ծառայում կոռուպցիոն կոնկրետ դեպքերի մասին հանրության իրազեկումները:

ՙՀայաստանը որոշակի հաջողություններ է գրանցել միջազգային ահաբեկչության դեմ պայքարի գործում՚, — գտնում է Հակոբյանը: — «Մեր գործընկերների հետ միասին շարունակում ենք ահաբեկչության դեմ պայքարը եւ հետեւում ենք բազմազան արտաքին վտանգներով լի այս տարածաշրջանի դինամիկային»:

«Ազատություն» ռադիոկայան